2014年11月3日星期一

錯過咗 又如何? (信報 01/11/2014)

曾在Facebook讀過一句︰盲婚啞嫁年代,老一輩善於「修補」關係;現在自由戀愛,新一代只識「更換」關係。
物質過分豐富,要求唾手可得,我承認與很多八、九十後一樣,不會懂得「珍惜」所有,時刻會埋怨「錯過」太多。一個發展機會、一份高薪厚職、一個愛情筍盤……只要肯諗,多多事情都值得後悔,但非常浪費精力。
曾經有段日子,投機不甚如意,同一位前輩傾佛偈︰我發覺輸錢,並非冇嘢好買,而係咩都想買!前輩笑指出,一年前已聽過同一番話。以執筆時為例,左眼見到謝霆鋒將旗下後期製作公司Po注入漢傳媒(00491),借殼上市,右眼發現香港電視(01137)將於下月中旬開台而乘勢炒起,耳仔聽到東江水加價概念的粵海投資(00270)繼續尋頂,電力股受新季業績支持重新落鑊……貪婪成性使然,每日出出入入,成為家常便飯。
苦難不止於此,你同時間會發覺,錯過咗一籮籮機會︰具前海概念的深圳國際(00152)突破橫行區後爆上25%。中國水務(00855)創一年新高後,升25%。高陽科技(00818)觸1.7元底後,兩周內升超過四成……所有錯過咗,果真愈問愈傷心?
先旨聲明,我從沒性別歧視,但永遠唔理解,好多如王迪詩般的高貴女士,儲夠50多對高跟鞋為己任,錯過一對限量版就恨足一世,卻明明只有一對腳!沒錯,這些意識形態與當下政治壁壘一樣,根本冇得解。
投機亦然,除非閣下腰纏萬貫,隨便可買起幾間上市公司,不然,一筆資金在一段時間內博取回報時,機會再多,仍是多餘。錯過咗,又如何?大半個月來,致力新攪作,除咗獨贏一隻中廣核美亞(01811)外,曾向網友提議個別炒作機會,個人卻沒大心思玩。不過,更懶惰不只換來空閒,回報卻沒大影響,係咪好神奇?
今日唔好意思,特意學方卓如咁,數數手指呃幾百字,原來真係work。下星期到沖繩享受一人之旅,申請「停牌」。