2014年10月30日星期四

要驚得有用 (信報 18/10/2014)

費高藝不高但人膽大,敢用文字隔空催眠你。唔信?過嚟做白老鼠。
先放鬆,合埋眼,你正在長長的隧道入面,一片漆黑。你一直行,見到前面的丁點光源逐漸放大,皮膚有種暖和感。莫名的信心,令你勇於衝出隧道外。呀!時光倒流,你返到去兩個月前的香港。
塵世再沒好消息
習慣地買份8月18日的《信報》,重溫當時迫近25000點的恒指。「滬港通」憧憬帶動,港滙呈強,外資被指追逐A股,散戶心雄,日日問價。當時你有一刻祈求過︰上帝(或者佛祖、黃大仙、關公)呀,可否給機會我低位撈貨?
我現在數三聲︰一、二、三!你回到10月17日。
恒指收低於23000點,投資氣氛大不如前。公仔箱及朋友不斷提你︰黃絲帶行動收唔到科,伊波拉病毒肆虐,美股跌穿什麼支持位,國債息率創新低……塵世間再沒好消息。滿手現金,但你不會有心情尋找機會,甚至相信「All Cash is King」。滿天神佛笑到肚痛︰畀多次機會你,咁又點?
嫌個市未驚夠,我不會於此時提倡「別人恐慌時貪婪」。不過,呼天搶地的人數逐漸增加,請撫心自問︰驚埋一份,有咩着數?早一個月前清點貨,造埋淡,賺得到,咁先叫「驚得有用」!
港股是國際大賭場,要知進退,請客觀認清外圍及內地市況。
是牛二調整 非熊市重臨
歐美位處高位,全因資金憧憬復蘇所致,增長遜於預期,收水計劃打擊信心,把整體證券估值降低,是屬牛二調整,卻難言熊市降臨。預期美股將在合理區間橫行,資金冇啖好食,唯有外求出路。
上証綜指重上2200點後橫行,再升至2300點,簡單一個字:強!請無視過去偏弱,但無阻勢頭的經濟數據,阿爺推動證券融資渠道改革,以及「滬港通」引領外資帶動藍籌股,才是大方向。
A股升得急,短期作適度整固,不構成看淡理由。
不要視內地樓價下跌為看淡理由;相反,游資自覺炒樓沒得賺,轉向各類證券投資,推動其他產業,可成內地股市助力外,中央亦樂見其事。
出現終極一跌的機率猶在,但個別板塊開始唔跟跌。恒指周線圖及月線圖均顯示,有緣再見22000點或更低時,可視作入市良機。信耶非耶,諸君自理。