2014年9月26日星期五

大事件 (信報 20/09/2014)

點睇天災或政經大事對投資交易的影響?我唔直接去答你,用例子答。
2011年3月11日下午,我在上海酒店房間,準備第二朝搭高鐵去杭州遊西湖及食龍井蝦仁時,電視傳來突發新聞︰日本東北地方太平洋近海發生9級地震,沿岸發生高度達10米以上的海嘯。我第一個反應都幾天真︰海嘯會否傳到上海?先打電話返屋企報平安,股票存倉懶得去理。七日行程後返回香港,我先有心情睇市。
同事描述,電視機轉播着災區最新消息,港股市場卻好似時間停頓般平靜。感覺就好似一個剛知道老婆有咗的男人咁,目瞪口呆。
地震當日是星期五,災情嚴重性在周未空檔逐漸發酵,猶如額外開支、住屋需求等壓力頃刻出現,教初為人父的男人徬徨無助。周一(3月18日)開始,恒指水銀瀉地或尋底,由23200點快速跌至周五的22123點,五日跌幅達4.84%。若果在報價機前,即使手上的SOHO中國(410)未有跟隨跌勢,我不擔保自己可抵受整體氣氛而不去清倉離場。
不過,恐慌的情緒好快消退,大市於第二周完全收覆失地。資金由恐慌復元至理性,速度可以非常驚人。
故事仲未講完,地震引發的海嘯,將整棟福島核電廠淹浸。數日後,爐心熔毀而引發爆炸,揭開核輻射洩漏序幕。日本及多國共同努力下,核污染仍不斷蔓延及擴大。
當全球各地立即叫停手上的核發展計劃,不論位處高位的美國上市ETF Nuclear Energy(NYSEARCA︰NLR),及本地上市的核能三寶,展開了悠長跌浪。更重要的是,當中最急勁的跌勢,不約而同地始於8月份,即實際上持份者有近四個多月時間部署,從而避過一劫。
上面講咗什麼?短期浪動,由大眾心理主導,可以無視;新長線趨勢,乃質變而成,謹慎探究。能達到上述兩點,要應對任何大事件,沒甚難度吧!